സ്വര്ണപാദസരം പിണഞ്ഞു കിടയ്ക്കുന്ന കാപ്പിനിറമാര്ന്ന
കാല്വണ്ണകളിലെ നീല ഞരമ്പുകളിലൂടെ കുതിച്ചു പായുന്ന
പച്ച ചോരയുടെ സ്വാദ് ചെറു സര്പ്പകുഞ്ഞുങ്ങളുടെ ഇരട്ട
നാവുകളെ അറിയിച്ചു കൊടുക്കണമെന്നുണ്ട്
മറ്റു ചിലപ്പോള് ............
പഠിച്ചു പൂര്ത്തിയാക്കാന് കഴിയാത്താ നൃത്തത്തിന് മുദ്ര
ഒരു നീണ്ട കയറിന് അറ്റത്തില് എന്നെ തന്നെ കുരുക്കി
വീണ്ടും കളിച്ചു പടിയ്ക്കണമെന്നുണ്ട് ,അവസാനമായി
ഇനിയുമോരിയ്ക്കല് . ..............
അലയ്ക്കുന്ന കടലിന്റെ നീലിമയുടെ ഘനമളക്കാന്
ആഴങ്ങളില് ഒന്ന് തൊട്ടു നിവര്ന്നു ഭാരമില്ലാത്ത
പൊങ്ങു തടികളായി ഒഴുകി നീന്താന് മോഹമുണ്ട്
നിറങ്ങള് മാറ്റി കളിച്ചു സര്വം ദഹിപ്പിയ്ക്കുന്ന
അഗ്നിതന് കെടാത്ത വിശപ്പു ശമിയ്പ്പിയ്ക്കാന്
എന്നെ തന്നെ എറിഞ്ഞു കൊടുക്കണമെന്നുണ്ട്
ഇനിയും ഒരു കൊച്ചു മുറിവിലൂടെ രക്തയോട്ടതിന്
ഗതി തിരിച്ചു വിട്ടു എന്നെ തന്നെ ഇല്ലാതാക്കണമെന്നുണ്ട്
വേണ്ട ,ഇതൊന്നും ............
എത്ര നിസ്സാരം ............
നിന്റെ മടിയില് തലചായ്ച്ചു കിടക്കുമ്പോള് ,
സൂര്യന്റെ വെയില് കുട്ടികള് എനിയ്ക്ക് ചുറ്റും
നിലാവായി നൃത്തം ചവിട്ടുമ്പോള് ,നേര്ത്ത
മോതിരവിരല് കൊണ്ടു എന്റെ കണ്ണിനും
ചുണ്ടിനുമിടയില് മറഞ്ഞു കിടക്കുന്ന ഒരു
ത്രികോണത്തിന്റെ ലംബങ്ങളും കര്ണങ്ങളും
വരയ്ക്കുമ്പോള് വിരലുകള് കൊണ്ടെന്റെ
ഉച്വാസങ്ങളെ തടുത്തു നിര്ത്തി എന്നെ
തന്നെ ഇല്ലാതാക്കുക ...........